معلومات مهمة بخصوص استلام أرباح أدسنس بالجنيه المصري

لو عندك أكتر من 25 دولار في حساب أدسنس، وضايف وسيلة دفع سواء حساب بنكي أو ويسترن يونيون، هيتم تحويل المبلغ بالدولار لوسيلة الدفع دي يوم 21 أبريل 2025.

لو عندك أقل من 25 دولار، أو حتى أكتر بس لسه مضيفتش وسيلة دفع (زي الحساب البنكي)، أو عندك تعليق في الحساب بسبب عدم إثبات الهوية أو العنوان، ساعتها الرصيد اللي عندك هيتحوّل تلقائيًا لـ حساب الدفعات الجديد بالجنيه المصري. ومش هيتحول لحسابك البنكي غير لما الرصيد يوصل لـ ما يعادل 100 دولار، يعني حوالي 5000 جنيه مصري.

يعني باختصار :

الحد الأدنى للدفع الشهر ده بس هو 25 دولار.

وبداية من شهر مايو، التحويل هيكون بالجنيه المصري من خلال الحساب الجديد وطريقة الدفع الجديدة والحد الادني للدفع ما يعادل الـ 100 دولار يعني حوالى 5000 ج .

الحساب القديم بالدولار هيتلغي ومش هيكون فعال تاني.

**** بالنسبة للناس اللي كانوا بيستلموا عن طريق ويسترن يونيون

"في حال تلقّي الدفعات عبر Western Union، ليس عليك اتخاذ أي إجراء."

وده معناه إنك مش مطالب تعمل أي حاجة…

لكن لما تدخل على حساب الدفعات الجديد وتروح تضيف وسيلة دفع، هتلاقي ويسترن يونيون ظاهر، لكن مكتوب عليه:

"يتعذر استخدام هذه الوسيلة لهذا المنتج" – زي ما ظاهر في الصورة.

السؤال هنا: لو أنا بستلم عن طريق ويسترن أعمل إيه؟

ببساطة: استنى لحد آخر شهر 4 أو أول شهر 5، لما يتم إلغاء الحساب القديم بالدولار، وساعتها نشوف هل هيشتغل ويسترن يونيون على الحساب الجديد ولا هيكون غير متاح زيه زي الحساب البنكي بالدولار.

أنا نفسي مش متأكد ومستني زيي زيكم.

سؤال مهم كمان: لو أنا ضفت حساب بنكي بالجنيه المصري على الحساب الجديد، ولسه مبلغ التحقق موصلش، هل كده أرباحي مش هتوصلني على الحساب القديم اللي فيه أكتر من 25 دولار؟

الإجابة: لا، أرباحك هتتحول عادي جدًا على الحساب القديم، لإن الحسابين منفصلين، وطالما الحساب القديم مضاف فيه وسيلة دفع، فالدفع هيتم بشكل طبيعي.

هل ينفع أستنى لآخر الشهر أتأكد إن أرباح أبريل وصلت، وبعد كده أضيف حساب البنك بالجنيه؟

أيوه ينفع، مفيش أي مشكلة.

لو حسابي البنكي بالجنيه كان بيستقبل تحويلات بالدولار، هل ينفع أضيفه في الحساب الجديد؟

أيوه ينفع، مفيش مشكلة.

بس لو الحساب من الأساس حساب بالدولار، ممكن مايقبلش الجنيه المصري. والأفضل تتأكد من البنك بتاعك.

لو أنا ضفت الحساب البنكي وكتبت SWIFT كود الفرع، وعايز أتجنب الخصم الكبير وأستخدم السويفت الرئيسي، أعمل إيه؟

في الحالة دي:

أضف الحساب مره اخري بنفس الرقم لكن باستخدام SWIFT الرئيسي (بدون كود الفرع).

خلي الحساب الجديد هو الرئيسي.

احذف القديم بعد ما تتأكد من وصول مبلغ التحقق. ملحوظة: هيجيلك مبلغين تحقق من جوجل، واحد بالحساب القديم والتاني بالجديد، فاستنى أسبوع مثلًا قبل ما تضيف الحساب الجديد علشان تضمن إنك تعرف تميز المبالغ دي.

أنا دلوقتي مثلا ًعندي أكتر من 40 دولار، ولسه معملتش حساب بنكي، وناوي أفتح حساب بالجنيه المصري… أضيفه فين؟ في حساب مصر بالدولار ولا مصر بالجنيه؟

الإجابة:

بما إنك لسه مضيفتش أي وسيلة دفع، فجوجل هتحوّل حسابك تلقائيًا لـ نظام الدفعات بالجنيه المصري.

لما تعمل حساب البنك بالجنيه، هتضيفه في حساب الدفعات الجديد – مصر بالجنيه، وليس الحساب القديم بالدولار.

ولو حسابك فيه تعليق (زي عدم إثبات الهوية أو العنوان)، الرصيد كله هيروح تلقائيًا للحساب الجديد ومش هيتحول لحسابك البنكي إلا لما يوصل لـ 5000 جنيه.